هي : اريد أن أشم بعض الهواء النقي



هو : اجلسي لن تذهبي الى اي مكان


هي :دعني اخرج اريد ان اشم بعض الهواء


هو : الايكفيكي هذا الهواء داخل البيت


هي : لا : مش مكفيني


هو : تحبي تشميه عند اهلك


هي : انت بتتمسخر علي


هو : ليه اتمسخر انا باتكلم جد


هي : خلاص وديني عند اهلي


هو : قومي البسيهي : لأ مش حالبس - حاروح كده


هو : انت باين عليكي اتجننتي


هي :ان كان عاجبك


هو :لأ مش عاجبني


هي : طلقني


هو : انت طالق


هي : طلقني بالثلاثة


هو : انت طالق - طالق - طالق


هي : روح منك لله


هو : مش انت اللي عايزة


هي :انت ماصدقت


هو : عشان تشمي هواء نقي في اي وقت عايزاه

لم يكن في الحسبان أن يرتبط بفتاة صغيرة ولكنه القدر لا ليس قدرا إنه اتهام للقدر إنه اختيار نعم اختيار ولكن ليس بالعقل وانما اختيار بالقلب لا اختيار القلب لابد ان يكون صادقا اذا هو ليس اختيار نعم انه ...........انه ماذا؟



حصل ماحصل اذا هو قدر , خلاص قدر... - ولكن هل طوال خمسة عشر عامامليئة بالحب والعشق والذرية لم تعرف من هي؟ لا......... لاأعرفها سوى ملاكا .


ولكن لاتوجد ملائكة من البشر ........ اذا كيف كنت تحسبها ملاكا؟


صحيح اذا هو اختيار خاطئ .


نعم ولكن منك .


ولكني لم انظر اليها سوى انها انسانة كادت تقتل نفسها عندما قررت عدم الأرتباط بها.


اذا قد جاوبت على نفسك.


ماذا تقصد؟


ياعزيزي انها شيطانة.


أتقصد انها قد خدعتني طوال هذه السنين.


وهل الشيطان يتوب منذ خلق ؟


لا.............


اذا فهي ليست ملاكا


نعم نعم أنا من كنت احسبهاملاكا


ولكني كنت دائما أعطي ولم تتذكر اي شئ من عطائي


الم أقل لك انها شيطانة


نعم : انها من شياطين الإنس


أكيد للحديث بقية










أنا حاسألك سؤال ؟ مين المخلوق اللي مازال عايش بينا الى الآن ولم يمت


ابليس


كويس : هي ديه بقه ابليسة دبحت نفسها عشان تجر رجليك بس لما عملت كده عملتها بطريقة ابليس


ازاي يعني مش فاهم


ياحبيبي هي كانت عارفة بتعمل ايه وهي بتدبح نفسها بحيث ان ماتموتش يعني شوية دم يخلوك تبيع الدنيا عشان توافق على اي شئ تطلبه .فهمت ولا لسه


تقصد تقول خدعتني


اكيد


بس ده يأكد انها عملت كده عشان بتحبني


هي أكيد بتحبك وبتعشقك كمان


انت حيرتني معاك


يابن الحلال الحب احتل اكبر جانب من تفكيرها وفي نفس الوقت البنت لما الرجل يرفضها بيبقى الموقف صعب عليها لان دايما حايبقى فيها القيل والقال خاصة من ناحية عيلتها


انت تقصد انه كان حب مع رد كرامة ليها بأي ثمن


بالضبط الله ينور عليك


يعني كبريائها اتأثر برفضي ليها


ايوه وهو ده اللي خرج ابليس من الجنة الكبر والكبرياء ....عرفت ليه بقولك شيطانة


لازم تعرف ان البنت دايما ليها رونقها وعزتها وخوفها من ربها في اي شئ تحاول تعمله ..يعني لما انت تركتها كان ايه السبب؟


طلبات اهلها اللي فوق الواقع.. المهر 300000 الذهب 50000 وغيره


لاحول ولاقوة الابالله --- ودفعت ده كله


لا اتفقت مع ابوها ادفع نص المبالغ اللي طلبها ووافق


وايه اللي اجبرك على كده


الجواب اللي بعتتهولي مكتوب كله بدمها مسكت الجواب وانزهلت من اللي شفته فيه


شفت ايه؟


للحديث بقية
هههههههههههههه البقية في حياتك!!!!!!!!

عشرين سبب خلوني احبك لانك بتعشقي الانسان بوصفه انسان



لانك مافرقتيش بين دين وملة ولابين عرق ودين


عشت معاكي في حلم وردي بعيد عن كابوس الارض


عرفتيني ان الجسد نقيض الروح وعشان أعلى وأعلى لازم ادمر جسدي


عشان تعلى روحي وتعلى


في انتظارك حبيبتي

رجعت للزحمة والجري مرة تانية!!!!


ايه الحل


مافيش غير اني أشيل عقلي من قلبي وأحبس قلبي بين ضلوعي


عشان مايدقش بسرعة


بس اعتقد ان فيه ناس كتير عرفت تدفن قلوبها للأبد


بس ياترى بقى لونها ايه؟؟؟

خلاص زهقت ومليت اني اقرأ الكلمة بتاعة كل يوم خلاص بقت باهتة ملهاش لون ولامعنى بقت رماد مافيش فيها روح مافيش فيها تجديد بقت بخيلة ماتديش



حروف مليانة ومزحومة بكلمات تتكلم عن الفقر والجوع والحرب والسلام اللي بنقرى عنه حقبة من الزمن عن الخداع وعن العرب وخلافتهم مع بعضهم وده يشتم ده وده اكبر من ده وده اغنى من ده وده وده وده


الوش الحقيقي للكلمة غاب ومعدناش نقراه في الجرايد اللي بتنطق بالضاد او حتى نسمعها في الاذاعات


كل اللي بنسمعه ونشوفه ماهو الا استفراغ ريحته وحشة بس ادمناها وخدنا عليها


وكل اللي بنشوفوا ازاي تقدر تدمي الشعور!!!!!!!!!!!!!!!!!!!

تعالي ..... لسه النجمة اللي شهدت حبنا مانطفتش



لسة النجمة سهرانة لوحدها مستنياكي ماهمهاش تكون غريقة في النهار


دايما يفضل للمحب شئ جواه مايقدرش يبعده او يزيحه برغم انه فشل او عجز في انه يحقق اللي المفروض انه يحصل في اي قصة عشق


والشئ ده يفضل يدور في صدره لحد مايهلكه ويموته


ليه دايما تمارسي عدم البقاء كل مازاد عشقي ليكي وليه تبعدي كا ماتقربت ليكي؟؟


حددي لون أخلص بيه لوحتي!!!!!!!!!

النهاردة كل واحد فينا بيستمتع بـ لا من كل آه



بنستمتع فوق لا مكان للعشق والحب....... بنستمتع فوق لا مكان للرحمة .....وفوق لا وجود للتكاتف


احنا بنجري فوق أي ارض !!!!!!!!!! عشان نستريح من تعب المطاردة والخوف


والعرق اللي نزل من كتر الجري نزل بلون !!!!!!!!!!


لسه مش عارف اللون؟؟؟؟؟؟؟؟؟؟

كل شخص فينا يضطر احيانا انه يهب نفسه فداءا للمحبوب



ولكن في حالة واحدة بس انه فعلا يكون تجرع من الحب والعشق من حبيبه كمية هائلة من اللمسات والنظرات من الهمسات واللهفات


بمعنى تاني كل حاجة خدها من حبيبه


والعاشق العربي عامة نلاقيه دايما هو استاذ العشق هو الولهان حتى أن الناس يضحكوا عليه من كتر عشقه بالرغم انه هو اللي علمهم كلمات العشق او يضحكوا عشانه


وفي نفس الوقت نلاقي كل اللي حواليه هم اللي صنعوه وصنعوا الشهرة لعصره وزمنه


وفي الأخر العاشق هو الخسران لأنه غرق في أحزانه لوحده وهم اللي غرقوه من غير مايحس


ولحد دلوقتي لسه مايعرفش ان الصح والغلط ماهو الا لحظة لما يطلع حقيقته للناسوفي لحظة مايستعيد منهم الحقيقة تكون اتلوثت......لون أسود أصبح نقطة سوداء في حياة عاشق

التشكيلي نبيل بكير

كل واحد بيحرص على عمره ويتمنى ان ربنا يمدله فيه



كل المطلوب منه انه يشغل نفسه في تأمل داخل نفسه حتى ولو ساعة كل يوم


وبكده حايكون ليه توازن بينه وبين عمره


في التأمل حتلاقي دقات قلبك عددها أقل حتى الاكسجين اللي بتحرقه بيكون أقل وبكده ممكن يطول عمرك


حتى كل الدكاترة اجمعوا عشان تتخلص من اي مرض نفسي او اعصابك الشايطة انك ترخي جسمك كل يوم ولو ساعة على كرسي


ساعتها تحس ان كل واحد له مصلحة عندك خلصت وخدوا حقهم بما يرضي ربنا


وتحس ساعتها انك ماظلمتش حد منهم






طب بدل دا كله ليه مانعملش بجمل قالها سيدنا النبي عليه الصلاة والسلام


اذا عمل احدكم عمل فليتقنه


وحب لأخيك كما تحب لنفسك


واتق الله اينما كنت






غريب قوي بني آدم لازم يمسك ودنه الشمال بإيده اليمين






صدق الحق (وكان الانسان جهولا )

انا عارف ومتأكد اني عربي



والدليل اني دايما مفتقد الاحساس اللي ببلاش


لاني بمثل اللهفة اني اكون حر وحقيقة اي زعامة تساعدني اني اكون الحر ده


اللهفة حتى مابقأتش ليها اي قيمة في زمن البزنس وهات وبعدين نفكر تاخد ولا لأ


لأني عربي حطموا انسانيتي على ارصفة الادمان لسفك الدم وقتل الأبرياء والحقد على باقي البشر


نفسي امتة حاترجعين

مطلوب من كل واحد فينا انه يحبس احلامه ويعتقلها قول يوم يومين اسبوع



صخب وزحمة البزنس في زماننا دهماخلتش لأحلامناحتى ولو ملامح من الحب


صدمات الغدر والطغيان التعسفي مع جبروت الظلم وتسلط السفهاء كل دول اعتقلواأحلامنا ونفونا لجزر الغربة ومرارتها


الواحد فينا لما يسيب نفسه ورى أحلامه ساعتها يحس ان الامواج هيه اللي بتشكل حياته


عامة الواحد فينا بيعيش دايما مابين المد والجزر مابين حياة بيتمناها وموت يخطفه فجأة


مابين حرية هو بيتخيلها او بيحلم بيها وبين استعباده لبعض الحاجات


لاننا دايما نستغل اي حاجة حبيناها وكل من نحبهم

عشقتها



كل حتة فيها عشقتها


حتى عضامها عشقتها ......علمتني الوان العشق عرفت ازاي احب كل شعرة من شعرها


لمسات قوامها النحيف بصوابعي نحلت كل شعرة عندها


قررت اشوف حب بديل لكن لقيتها لسه بتعشق اسرار نفسها وتعشق اسرارها جوايا


ريشتي مازلت اعشقها................ريشتي لن اتخلى عنكي

تعبت من الجري



وتعبت حتى من الخطوة السريعة


تعبت من كل الاتجاهات والشوارع والحارات..........خلاص مابقتش قادر اتحمل اتصرمح هنا وهناك


مابقتش قادر اتحمل اني اتنقل من وش لوش لأت كل الوشوش بقت زي بعضها مافيش اختلاف


وقفت من التعب وقعدت وغمضت عيني وفي لحظة سمعت صوت مداريه وش ولاكل الوشوش وش نادر في الوجود


لحظة وحسيت بقلبي حسيت بحب فجأة حب عنيف حسيت بضلوعي تتحرك ودقات قلبي بتجري


قررت اتجوز من غير مافكر اصلن الحب مافيهوش تفكير


وفجأة سمعت صوت بيقوللي مسكين!!!!!


كنت عاوز تهرب من كل شئ متشابه وتموت


واديك مت بالحياة و بالعشق

الليل



أه من الليل لما يسكن وحدتي


الاقي قلبي اتحول لقنديل ام هاشم كانوا زمان يقولنا ام هاشم بينزل على ضريحها قنديل بالليل ينور لزوارها


اما قنديلي انا غير !!!!!


قنديلي يملى كل الزوايا اللي في صدري همس بس من غير حلم بل اتفاقات وصفقات تشعلل مابين الحنين والتمني


والشوق والرجاء


لحد ماكسب الحنين جايزة العواطف


واحنا هل نقدر ندي طريق للخوف اللي محتل كل كيانا انه يرحل ولو ساعة ويرجع


ولا الاحسن نواجه خوفنا ونقاومه ونهزمه احسن مايقتلنا ونبقى انتصرنا عليه


هو ده السؤال اللي محيرني

بناتي ..حبايبي وروحي وعمري



زمن غريب وعجيب زمن كله صراع


بخاف عليكم قوي


حاتفضلوا في عيوني لحد الفجر والفجر اللي بعد الفجر واللي بعده


بس ياترى لحد امته حاييجي فجر بعده فجر


ياترى حاييجي غيره


عارفين يابناتي نفسي في ايه ؟ نفسي أنام وأنا مرتاح


خايف عيني تغفل عنكم والزمن غريب وعجيب


لألأ مش حانام حافضل صاحي


حافضل شمعة سهرانة تحرصكم وتنور ليكم طريقكم وأحميكم من زمن عجيب وغريب


حتى يأذن الله في أمري

حرب ... حروب



كلمات بكرهها زي كرهي لأبليس


الحرب ... الحروب .... دم .... دماء !!! مافيش ماء


عايزة ايه وهدفك ايه؟


فتنة


طب ليه؟


عشان انتوا العرب تنسوا الحب


ننسى الحب!!!! ازاي


أيوه .. تنسوا الحب ونلغي حاجة اسمها (وجعلناكم شعوبا وقبائل لتعارفوا)


آآآآه تلغوا الروابط اللي بينا وبين بعضينا تلغوا النسب اللي بينا وبين بعض


ياااااااااااااااااه معقول بس احنا العرب نخوة وقوة ورجولة مافيش زيها في العالم


العرب دايما صادقين في عواطفهم ومودتهم


أنا معاك بس قدرنا نحولكم أو على الأقل نحول بعضكم


ازاي مش فاهم؟


مش قلنا عليكم ارهابيين.. سفاكين دددددم....محتالين وقراصنة


على رأيك العرب الصراحة الأيام دي بقوا محترفين غضب وعايشين في عالم مايعرفش الغضب بس فالحين يعصبوا ويجنوا ويتأمروا ويتهدموا


فين اللون اللي مش عارف اكمل بيه لوحتي

أنا شفتك



أيوه شفتك صدقيني


شفتك في أبعادك اللي ملهاش نهاية


في براءة طفولتك


في عز غضبك الحارق ... اللي بيحرقك انتي وكل اللي بيحبوكي ... وكل اللي جريوا وراكي !






وأنا شفتك كما صدقني


شفتك واحد مغرور متعجرف عنيف .........بس ضعيف خايف


خايف من بكرة وخايف من وحدتك


جواك صراع كله خوف كوكتيل شوية رعد وبرق ومطر وشوية سحاب مع نجوم وشوية أمل مع يأس


حتى الفرح متككتل مع الحزن






وأنا عرفتك انتي حوا جميلة بجد روعة بجد جواكي طاقة تفجر عيون


جواكي نور وحياة بس ياخسارة من كتر حبك لنفسك بتتهزمي بسرعة


عارفة ليه


لأنك دايما تقولي (أنا أنا نفسي وبس )


صدقيني اللي بيحب نفسه وبس يقع لوحده برضه وبس


وحشة الوحدة صدقيني


لوحتي !! لوحتي !!! بتعملي ايه ؟ ليه كده ليه؟


عشان لوحتك ماتكملش!!!!!!

دي بقى لوحة جوه نفسي جوايا ... بس مش عايزة تكتمل!



خطوطها عريضة توحيلك بسؤال حنون يفتش عن همسة ماضي عن ثواني ذكريات عن لحظة صدق او وفاء


التفت وانا متابع جموع الراجعين من الشاطئ لـ صخب المدن الكبيرة التزاحمة


لوحتي مش عايزة تكتمل بجد .... لكن العيون فيها قربت على نهايتها


طابور العربيات الراجع للـ المدينة وطابور الضحكة العفوية والمزيفة اتجمع فوق الشاطئ ويتحرر مع الضحكة راجع للبحر ممزوج بالموج وكأن البشر يرمون تلك الضحكة مع همهم ومشاكلهم حتى ان كل شئ اتمزج بالموج


طابور الشجن اللي ركد في الصدر راح مع دوول الهربانين للبحر بس شوية منهم اتخلف فوق تلة صغيرة ترمي على الشاطئ بالاصح تبص على الموج


حتى ضجيج اشعة الشمس بدأ ينكسر شوية شوية مع ميعاد غروبها


لوحتي مش عايزة تكتمل لكن كنت دايما اهرب ناحية الموج وزرقة مية البحر ففضلت قدام مية البحر زي ماكون عاوز ساعتها اني اوقف كل موجة جاية


ضحكت لان البحر عمره ماحيتنازل عن طبيعته لان الموج هو نبضه ودقاته


عشان كده كانت دايما طبيعة البحر هادرة وكلها عواصف وغموض والبشر زي البحر وموجه

مرة واحد كده وانا قاعد لوحدي فجأة انتشر هدوء غريب زي شعاع كأنه جاي من بعيد



وفجأة برضه احتوى الليل المكان وحضن كل الكون ده


وفجأة رجع الموج يصطدم بالراحة بالشط


وانا في تفكير متواصل متصاعد زي نبتة الصبار


حاسس اني بحس وادور عن نفسي الي دايما في غربة


كل مااتفق مع عشقي تطلع الحياة بعمر جديد


واهيه الوحدة تيجي فجأة تحي نظراتي المتبعثرة ناحية اشياء ممزوجة بأنوار الشوارع البعيدة اللي كلها الوان والمعكوسة على صفحات البحر المتموجة


وفجأة


غابت لوحتي


وبقيت أنا لوحدي مستني وان خايف ارتداد كل موجة


كأني في وقفتي دي مستني الانتظار عشان نروح مع بعض ليها


حبة اللؤلؤ الكامنة في أعماق البحر!!!!!!!

انتي ايوه انتي


ليه دايماتطاردك رغبة الطلاق من الدنيا


ليه دايما تحرضي غيرك عليها


رغم انك ماستعدتيش لسه للموت؟!


مش الطلاق من الحياة معناه الموت؟!


طب ليه بتطلبي الموت


طب ليه ماتموتيش اصلا طالما قادرة على انك ترفضي وتصرخي


وبعدين ازاي مايكونش عندك شروط


وانتي دايما بتقولي (ان المحبة هي طفلتك )


كل اللي كانت المحبة شرطه في الحياة ازاي يطلق الحياة ؟!


مش شايفة انك متناقضة ؟!


اذا كان وفاء البشر جاحد واخرس واصم واعمى ... طب ايه هو ذنب الحياة والامل والوفاء


مش شايفة ان تجربة واحدة مش ممكن تخلي الحياة في نظرك بكل دا القبح


لابد اننا نتجاوز قبح الانانية عشان نوصل للـ الوفاق والتوحد مع المحبة

نبيل بكير ........... قلبي واحد

قلبي واحد............ وعشقي انت من دون النساء



نعم انت فقط ….من دون النساء ……..نجمة من دون النجوم ..نجمة صباحي


التي تزداد ارتفاعا في بداية كل ميلاد جديد ويوم سعيد.. ساطعة مشرقة طاهرة من اصبع قدمك


حتى نهاية خصلات شعرك....أحيا بنظرة من عينيكي....أشفى بهمسة من شفتيكي


عنق ندي...شعر لازوردي....جسد يفوق الذهب....أنامل كبراعم الجوري......بخطوات رشيقة تخطو


فتذيب برد الشتاء وتشعل نار قلبي وكأن الشمس اقتربت لحظة بلا رداء


معشوقتي


عذاب قلبي بهمسك...الجنون ترسخ مني ...عشقك تملكني ....أحضانك تدفئني


متى تعودين

كم كنت أتمنى أن أكون ثوبك الذي كنتي دائما ترتديه لي.فتغرقيني..........وكم كنت أتمنى أن أكون الماء الذي ينسكب على جسدك فتطهرينه



كم كنت أتمنى أن أكون البلسم الذي كنتي تضعينه على شعرك وبأناملك تدللينه.......كم كنت أتمنى أن أكون تلك الفرقة التي بين نهديكي


وتضعين عطرك فتأسرينه .....كم وكم كنت أتمنى أن أكون مشطك الذي كان ينساب من بين حرير شعرك فتلتقطينه.......كم كنت أتمنى أن


أن أكون عقدك الماسي الذي كنتي تضعينه حول عنقكي فتزيدينه بريقا فأشتهيه......كم وكم وكم كنت أتمنى أن أكون هوائك الذي تتنفسينه


كي أعبر من بين شفاهك الى قلبك دون أن تشعرين.....


أقول لكي:


دعيني الليلة مع طائر الليل الحزين

حبيبتي لاتحزني......ولاتيأسي من تلك القلوب السوداء .....لأنها لاتعرف طريق النور ....انها مظلمة كوجوههم



حبيبتي لاتصرخي في قلوب كحقول مهجورة رمادية عارية فصراخك لن يسمعه سواكي والعاشقين


حبيبتي لاتجزعي من حياتهم المقهورة .......حاسدون ...حاقدون.......للعشق كارهون ....للظلمة راغبون


يعلمون أنهم لن يكونوا مثلنا سكارى عشقنا......يفهمون أنهم منبوذون من عالمنا .....نعم انه عالم خاص للمحبين


عالم نقي كطهرك أنتي .....عالم سرمدي ترتقي فيه أرواح العاشقين نقهر فيه امثال فرعون وقوم لوط


حبيبتي في انتظارك.....فساعات رحيلي لم تنتهي بعد

عش انت اني مت بعدك.....عش انت فقد مت أنابسنوات من العذاب ودروبا من الجراح .....عش سنينا أو أياما أولحظات عش كما شئت ولمن تشاء



ياقاتلي....عش انت...اجرح انت فلن تتبدل الأنهار دموعا ...ولن تتحول المشاعر شموعا تطفئ من جفاف دموع....لن ينزف دم المقتول بطعنات الهجر والعصيان ياقاتلي


لم تجرح سوى قلبك...ولن تدمع سوى عينك..ولن تندم سوى نفسك....آآآه من قلب يبست مشاعره وتحجرت أحاسيسه


قاتلي......... مت أنت اني عشت بعدك


مشاعري لم تقتل بعد